Proverbs 7

Isixwayiso Emfazini Oyisifebe

1Ndodana yami, agcine amazwi ami
ulondoloze imilayo yami ngaphakathi kwakho.
2Gcina imilayo yami ukuze uphile;
ulinde imfundiso yami njengegugu lakho elikhulu.
3Ibophele eminweni yakho;
uyilobe enhliziyweni yakho.
4Tshela ukuhlakanipha uthi, “Ungudadewethu wena,”
uthi ukuqedisisa kuyisihlobo sakho;
5lezizinto zizakuvikela emfazini oyisifebe,
lakumkakho ongelambeko ngamazwi akhe adukisayo.

6Ngema ewindini lendlu yami
ngalunguza ngesikhala.
7Ngabona phakathi kwabayizithutha,
ngananzelela phakathi kwamajaha
ngabona ijaha elingelangqondo.
8Lalisehla ngomgwaqo liseduze lejiko,
liqonda endlini yowesifazane
9ntambama sekunqunda amehlo,
umnyama wobusuku usujiya.

10Khonokho nje kwaqhamuka owesifazane elihlangabeza
egqoke okwesifebe ngoba eqophile.
11(Umfazi lowo, ngumuntu womsindo uyisiqholo,
inyawo zakhe kazihlali phansi;
12khathesi nangu emgwaqweni, njalo nangu enkundleni,
utshobatshoba izindawana zonke.)
13Wafika waligona lelijaha walanga
wakhuluma engelanhloni wathi:

14“Ngenzile umnikelo wobudlelwano ngekhaya;
lamuhla ngizigcwalisile izifungo zami.
15Yikho ngilapha ukukuhlangabeza;
sengikudinge ngaze ngakuthola!
16Sengiwendlele umbheda wami
ngamalineni eGibhithe awemibalabala.
17Sengiwuqholile umbheda wami ngemure,
ngenhlaba langesinamoni.
18Woza sizitike ngothando kuze kuse;
kasizijabulise ngothando!
19Indoda yami kayikho ekhaya;
ihambile iye khatshana.
20Ithwele isikhwama sayo sigcwele imali,
ngakho kayibuyi kuze kube phakathi kwenyanga.”

21Ngamazwi akhe amnandi waledukisa ijaha lelo;
walihuga ijaha lelo ngolimi olumnandi.
22Khonokho nje lahle lamlandela
njengenkabi idonselwa ukuyabulawa,
njengomziki uzingenisa emjibileni,
23umtshoko uze uyehlaba isibindi,
njengenyoni ithothela ngaphansi kwesifu,
ingaboni ukuthi isizingenise ekufeni.

24Ngakho-ke madodana ami, ngilalelani;
zwanini lokhu engikutshoyo.
25Lingayivumeli inhliziyo ikhangwe yizindlela zakhe,
langabe iphumputhekele emikhubeni yakhe.
26Banengi labo asebadilizile;
izinkubela zakhe zilucaca olwesabekayo.
27Indlu yakhe ingumgudu oya engcwabeni,
iholela phansi ezindongeni zokufa.